Snjórinn kominn til að vera næstu daga

Það verður bjart og kalt næstu daga á höfuðborgarsvæðinu að sögn Teits Arasonar, vakthafandi veðurfræðings á Veðurstofu Íslands. Hitinn verður undir frostmarki og er snjórinn sem féll um helgina því kominn til að vera, að minnsta kosti í bili.

Þá verður vindur nokkuð hægur en Teitur segir að hæð sem sé fyrir norðan land virðist ætla að sitja þar kyrr í nokkra daga en hæðir halda lægðum í burtu sem færa úrkom og vind til landsins.

„Það verður því nokkuð svipað veður núna í nokkra daga og það verða því kjörin tækifæri til hvers kyns vetrarútivistar á höfuðborgarsvæðinu,“ segir Teitur í samtali við Vísi.

Aðspurður um veðurhorfur á landinu öllu segir Teitur að þær séu svipaðar og á höfuðborgarsvæðinu nema helst í dag, mánudag, þegar það verður norðaustan strekkingur með snjókomu fyrir norðan og á Austurlandi.

„Það er lægð fyrir austan land sem sendir úrkomubakka yfir en frá og með þriðjudegi mun hæðin svo taka meira völdin og það verður yfirleitt hægur vindur á landinu öllu, engin úrkoma og bjart veður. Það er kannski helst við blá austurströndina sem gæti gert smá él með vindi á þriðjudag, miðvikudag og fimmtudag,“ segir Teitur.

Veðurhorfur á landinu næstu daga samkvæmt vef Veðurstofu Íslands:

Norðaustan 10-18 m/s, hvassast SA-til og á Vestfjörðum. Dálítil snjókoma eða slydda N- og A-til, en él seinni partinn. Yfirleitt léttskýjað S- og V-lands, en stöku él syðst. Úrkomuminna með kvöldinu. Hæg austlæg átt og víða léttskýjað á morgun, en norðan 8-13 og og dálítil él austast. Frost víða 1 til 6 stig, en sums staðar frostlaust við sjávarsíðuna.

Á þriðjudag:

Norðan 8-15 m/s og dálítil él austast á landinu, en annars fremur hæg norðaustlæg eða breytileg átt og yfirleitt léttskýjað. Frostlaust syðst, en frost annars 0 til 5 stig. Kólnar með kvöldinu.

Á miðvikudag, fimmtudag og föstudag:

Fremur hæg norðaustlæg eða breytileg átt og léttskýjað, en heldur hvassara og stöku él austast. Talsvert frost.

Á laugardag og sunnudag:

Austlæg átt og bjart með köflum, en strekkingur og dálítil él syðst. Áfram talsvert frost.