Ólafía Þórunn Kristinsdóttir náði sínum besta árangri á LPGA-mótaröðinni er hún hafnaði í 30.-39. sæti á ISPS Handa-mótinu í Ástralíu.
Hún lék á tveimur höggum yfir pari í nótt og endaði á að leika á parinu samtals eftir fjóra kepppnisdaga.
Það gekk á ýmsu í nótt. Hún paraði fyrstu þrjár holurnar en fékk svo ekki par aftur fyrr en á elleftu holu. Á þessum kafla fékk hún þrjá fugla, þrjá skolla og einn skramba. Það var afar vindasamt á keppnisvellinum í Adelaide í Ástralíu sem gerði kylfingum erfitt fyrir.
Á síðustu átta holunum fékk hún sex pör, einn fugl og einn skolla og kom í hús á 75 höggum.
Níu aðrir kylfingar enduðu á parinu og deila 30. sætinu. Þeirra á meðal er hin bandaríska Michelle Wie.
Ha Na Jang frá Suður-Kóreu bar sigur úr býtum en hún lék á 69 höggum í nótt og á tíu höggum undir pari samtals. Hanna Madsen frá Danmörku kom næst á sjö höggum undir pari.
Árangur Ólafíu er frábær og setur hana í enn sterkari stöðu á peningalistanum. Hún var meðal þeirra síðustu sem komust í gegnum niðurskurðinn og þurfti að vippa fyrir fugli á átjándu holu til þess, sem tókst. Hún endaði svo í 30. sæti af þeim 75 sem komust áfram. Spilamennska hennar í gær hafði mikið að segja, þar sem aðeins þrjár spiluðu betur en Ólafía.
Næstu tvö mót á mótaröðinni fara fram í Asíu en óvíst er hvort að Ólafía keppi á þeim. Keppt verður í Phoenix í Bandaríkjunum um miðjan mars en líklegt er að Ólafía komist á það mót.
