Refsing Real Madrid milduð

Real Madrid má kaupa nýja leikmenn til félagsins næsta sumar en það er niðurstaða gerðardómstóls íþróttamála í Lausanne [e. CAS]. Frá þessu er greint á vef BBC.

Spænska stórliðinu hafði upphaflega verið bannað að kaupa nýja leikmenn í næstu tveimur félagaskiptagluggum, í janúar á næsta ári og næsta sumar.

Sjá einnig: Madrídarliðin í félagaskiptabann

Alþjóða knattspyrnusambandið, FIFA, ákvað að refsa Real Madrid fyrir brot á reglum um félagaskipti leikmanna átján ára og yngri með þessum hætti og beitti einnig Atletico Madrid sömu refsingu.

Bæði félögin fóru með mál sitt fyrir gerðardómstólinn en niðurstaða í máli Atletico Madrid hefur ekki verið birt.

Real Madrid var einnig sektað um 40 milljónir króna en sú sekt var lækkuð í 26,5 milljónir.