Bætir í snjókomuna seinnipartinn fyrir norðan og austan

Það verður hvasst og úrkomusamt í allan dag á Norður-og Austurlandi samkvæmt upplýsingum frá vakthafandi veðurfræðingi á Veðurstofu Íslands. Þá mun bæta í snjókomuna á þessum slóðum seinni partinn og mun að öllum líkindum ekki draga úr ofankomunni fyrr en í fyrramálið. Akstursskilyrði eru því erfið, sér í lagi á fjallvegum og er ófært um Þverárfjall, Breiðdalsheiði og Öxi.

Talsvert hefur snjóað bæði fyrir norðan og austan í nótt og í morgun en fyrsta alvöru norðanátt vetrarins kom að landinu í gær. Stórhríð var þá á Norður-og Austurlandi en heldur hefur dregið úr vindi og nær stormviðvörun Veðurstofunnar nú aðeins til Suðausturlands þar sem búast má við meðalvindi yfir 20 metrum á sekúndu í mestallan dag.

Veðurhorfur á landinu í dag og næstu daga:

Norðan 13-18 metrar á sekúndu í dag, en 18-23 í vindstrengjum á suðaustanverðu landinu. Snjókoma eða él norðan- og austanlands, en slydda eða rigning við ströndina í kvöld. Skýjað með köflum um landið sunnanvert og sums staðar lítilsháttar él.

Norðan 10-15 á morgun og él eða slydduél fyrir norðan, en bjart syðra. Dregur meira úr vindi og úrkomu annað kvöld.

Á laugardag:

Norðan 10-15 metrar á sekúndu og éljagangur, en bjartviðri um landið sunnanvert. Lægir og styttir upp vestantil um kvöldið. Hiti kringum frostmark.

Á sunnudag:

Hæg breytileg átt og bjartviðri vestanlands. Norðvestan 8-13 um landið austanvert og dálítil él. Frost 1 til 9 stig, mest í innsveitum á Norðvesturlandi.

Á mánudag:

Hægviðri og léttskýjað, en norðvestan 5-10 norðaustanlands og svolítil él. Áfram kalt í veðri.

Á þriðjudag:

Suðlæg átt 3-8 og snjómugga, en slydda við sjóinn. Þurrt norðaustantil á landinu. Vægt frost, en frostlaust með suður- og vesturströndinni.

Færð og aðstæður á vegum:

Það er hálka og snjóþekja á vegum á Suðurlandi og skafrenningur á fjallvegum.

Á Vesturlandi er víðast hálka eða snjóþekja. Ófært er á Bröttubrekku.

Hálka og snjóþekja er á flestum vegum á Vestfjörðum. Ófært er á Klettshálsi og mjög hvasst.  Bjarnarfjarðarháls er þungfær. Ófært er á Dynjandisheiði og Hrafnseyrarheiði, og eins úr Bjarnarfirði norður í Norðurfjörð.

Það er snjókoma og skafrenningur á Norðurlandi, víða hvasst og sums staðar mjög blint. Lokað er um Þverárfjall en þævingur á Vatnsskarði. Hálka og skafrenninur er á  Möðrudalsöræfum.

Á Austurlandi er víðast snjóþekja eða hálka og éljagangur, Þæfingur er á Fjarðarheiði en þungfært og stórhríð er á Vatnsskarði eystra, ófært er á Breiðdalsheiði og Öxi.

Hálka, hálkublettir og mjög hvasst eru með suðausturströndinni.