Andstæður og brot í Salnum

Tónleikaröðin Tíbrá í Salnum í Kópavogi hefur farið sérstaklega vel af stað á þessu hausti. Næstu tónleikar eru á sunnudagskvöldið undir yfirskriftinni Contrast – Fragments, eða andstæður – brot. En á meðal verka er nýtt verk eftir Unu Sveinbjarnardóttur sem hún segir að hafi reyndar verið frumflutt á Dalvík í sumar.

„Við erum þarna hópur sem var að spila saman á Bergmálshátíðinni á Dalvík í sumar. Við ætlum að spila verk eftir mig við Vögguvísu eftir Ragnar Helga Ólafsson og það er í fyrsta skipti sem ég sem fyrir undirbúið píanó en ég er að spila á víólu í því verki. Með mér verða svo þau Kristján Karl Bragason á píanó, Grímur Helgason á klarínett og Hafdís Vigfúsdóttir á flautu og síðast en ekki síst Hildigunnur Einarsdóttir, mezzósópran.

Svo verðum við líka með lítil fiðluverk eftir mig, Bartók; Contrasts tríóið fyrir fiðlu, klarínett og píanó og sitthvað fleira en þetta verður mjög fjölbreytt og skemmtileg efnisskrá. Fleiri íslensk verk verða á efnisskránni auk þess sem franskur impressjónismi kemur við sögu. Þannig að það verða þarna bæði andstæður og brot enda er það yfirskriftin.“

Una segir að það sé skemmtilegt hversu vel Tíbrá hefur farið af stað í haust. „Það er gaman að hafa svona röð í gangi í Kópavogi því það er svo mikið að gerast í Hörpu og skemmtilegt að láta þetta dreifast aðeins. Þetta er æðislegur salur og það er alltaf gaman að spila þarna.

Greinin birtist fyrst í Fréttablaðinu 18. nóvember.