Hólmfríður lagði upp mikilvægt sigurmark

Avaldsnes setti pressu á topplið Lilleström með því að landa þremur mikilvægum stigum á móti Kolbotn í norsku úrvalsdeild kvenna í knattspyrnu í dag.

Norski landsliðsframherjinn Elise Thorsnes skoraði eina mark leiksins strax á 26. mínútu en íslenska landsliðskonan Hólmfríður Magnúsdóttir bjó markið til fyrir hana.

Hólmfríður Magnúsdóttir og Þórunn Helga Jónsdóttir léku allan leikinn með liði Avaldsnes, Þórunn Helga inn á þriggja manna miðju og Hólmfríður út á kanti.

Hólmfríður Magnúsdóttir hefur skorað fimm deildarmörk á tímabilinu en hefur einnig verið dugleg að leggja upp mörk fyrir liðsfélaga sína.

Þetta var sjötti deildarsigur Avaldsnes í röð en liðið náði að rífa sig upp eftir að hafa fengið slæma útreið á móti franska liðinu Lyon í 32 liða úrslitum Meistaradeildarinnar.

Avaldsnes er nú einu stigi á eftir toppliði Lilleström en norsku meistararnir eiga leik inni seinna í dag.