Kristófer tekur við Leikni

Kristófer Sigurgeirsson hefur verið ráðinn nýr þjálfari Leiknis Reykjavíkur í Inkasso-deildinni í fótbolta en þetta kemur fram á heimasíðu félagsins.

Kristófer tekur við starfinu af Kristjáni Guðmundssyni sem yfirgaf Breiðholtsliðið eftir eitt ár í starfi en undir hans stjórn endaði Leiknir í sjöunda sæti deildarinnar. Kristján tók við liði ÍBV um helgina.

Leiknisliðið verður nú undir stjórn þriðja þjálfarans á síðustu þremur árum en Freyr Alexandersson og Davíð Snorri Jónasson voru með liðið í Pepsi-deildinni í fyrra en létu af störfum eftir að það féll.

Kristófer var aðstoðarþjálfari Arnars Grétarssonar hjá Breiðabliki undanfarin tvö ár auk þess sem hann var yfirþjálfari yngri flokka Breiðabliks á síðasta ári. Hann hefur einnig þjálfað hjá Fjölni, HK og Reyni Sandgerði.

„Leiknismenn hlakka til samstarfsins og vænta mikils af störfum Kristófers sem þjálfara Leiknis á komandi misserum. Við bjóðum Kristófer virkilega velkomin í Leikni og efra-Breiðholtið,“ segir á heimasíðu Leiknis.