Fallegt mark Benat afgreiddi Arnór Ingva og félaga

Arnór Ingvi Traustason og félagar í austurríska liðinu Rapid Vín töpuðu fyrir Athletic Bilbao, 1-0, í baskalandi í F-riðli Evrópudeildarinnar í kvöld.

Eina mark leiksins skoraði Benat Etxebarria fyrir heimamenn í baskalandi með afskaplega fallegu skoti í þaknetið á 59. mínútu í síðari hálfleik.

Arnór Ingvi, sem gekk í raðir Rapid frá Norrköping í Svíþjóð í sumar, byrjaði leikinn en var tekinn af velli á 72. mínútu.

Rapid Vín er í þriðja sæti riðilsins með þrjú stig eftir tapið í kvöld en öll liðin í riðlinum eru með þrjú stig.

Genk frá Belgíu vann Sassuolo frá Ítalíu, 3-1, á heimavelli og er efst í riðlinum.