Einkunnir íslenska liðsins | Kári maður leiksins

Ísland gerði 1-1 jafntefli við Úkraínu í Kænugarði í fyrsta leik sínum í undankeppni HM 2018 í kvöld. Alfreð Finnbogason kom Íslandi yfir snemma leiks en Andriy Yarmalenko jafnaði fyrir Úkraínu menn í fyrri hálfleik.

Íslendingar fengu færi til að bæta við mörkum, sérstaklega í fyrri hálfleik, en allt kom fyrir ekki. Úkraínumenn voru öflugri í síðari hálfleik og fengu gullið tækifæri til að tryggja sér sigur en Yevhen Konoplyanka skaut í utanverða stöngina og framhjá úr vítaspyrnu.

Vísir lagði mat á frammistöðu íslensku leikmannanna og má lesa það hér fyrir neðan:

Markvörður:

Hannes Þór Halldórsson, markvörður 6

Átti í nokkrum vandræðum með skot langt utan af velli þar sem hann sló boltann í tvígang beint út í teiginn. Leiddi til jöfnunarmarks Úkraínu. Bjargaði vel í tvígang í síðari hálfleiknum.

Varnarmenn:

Birkir Már Sævarsson, hægri bakvörður 7

Fékk erfitt verkefni að gæta Konoplyanka en hélt yfirvegun allan leikinn og varðist vel. Ávallt vel staðsettur.

Kári Árnason, miðvörður 8 - maður leiksins

Öryggið uppmálað í vörninni. Gaf tóninn snemma og ákveðinn í öllum sínum aðgerðum. Hefur skilað boltanum betur frá sér fram völlinn.

Ragnar Sigurðsson, miðvörður 8

Heldur uppteknum hætti frá EM. Fastur fyrir og las sóknarleik Úkraínumanna vel.

Ari Freyr Skúlason, vinstri bakvörður 5

Átti í basli með stjörnu Úkraínu framan af leik. Fór meiddur af velli undir lok fyrri hálfleiks.

Miðjumenn:

Jóhann Berg Guðmundsson, hægri kantmaður 6

Duglegur líkt og allir leikmenn íslenska liðsins en lítið kom úr sóknaraðgerðum hans.

Aron Einar Gunnarsson, miðjumaður 8

Lykilmaður á miðjunni, þar sem hann vann ófáa bolta. Var duglegur að vinna til baka og hjálpa íslensku vörninni.

Gylfi Þór Sigurðsson, miðjumaður 7

Hljóp manna mest eins og áður. Vann boltann ítrekað á mikilvægum augnablikum. Tókst ekki að stýra sóknarleiknum nógu vel í síðari hálfleiknum.

Birkir Bjarnason, vinstri kantmaður 6

Lagði upp mark Íslands með sniðugri sendingu, vann vel fyrir liðið en náði lítið að stimpla sig inn í sóknarleik Íslands. Lítið með í síðari hálfleik þegar okkar menn áttu erfitt uppdráttar fram á við.

Sóknarmenn:

Jón Daði Böðvarsson 7

Duglegur sem fyrr og gerði varnarmönnum Úkraínu lífið leitt. en klaufi að skora ekki úr tveimur færum í sömu sókninni í fyrri hálfleik.

Alfreð Finnbogason, framherji 7

Var frábær í upphafi leiks og gerði vel í markinu sem hann skoraði og lagði upp frábært færi fyrir Jón Daða. Gekk þó illa að láta reyna á markvörð Úkraínu.

Varamenn:

Hörður Björgvin Magnússon 5 (Kom inn á fyrir Ara Frey á 39. mínútu)

Gekk erfiðlega að finna taktinn og skilaði boltanum oft illa af sér.

Arnór Ingvi Traustason - (Kom inn á fyrir Birki Bjarnason á 75. mínútu)

Spilaði of lítið til að fá einkunn. Braut af sér þegar Úkraína fékk vítaspyrnu.

Emil Hallfreðsson - (Kom inn á fyrir Jóhann á 84. mínútu)

Spilaði of lítið til að fá einkunn.