ÍBV vildi halda Bjarna

Bjarni Jóhannsson hætti skyndilega sem þjálfari ÍBV um helgina en félagið tilkynnti það á laugardagsmorgun.

Bjarni kom ÍBV í bikarúrslitin í sumar en hefur unnið aðeins einn af átta síðustu deildarleikjum sínum. Fyrir vikið hefur liðið sogast niður í fallbaráttu deildarinnar og er nú fjórum stigum frá fallsæti.

Það bil gæti minnkað enn frekar í kvöld en ÍBV mætir Víkingi á útivelli en á sama tíma eigast við Fylkir og ÍA. Fylkismenn eru nú fjórum stigum á eftir Eyjamönnum en Fylkir vann einmitt 2-1 sigur á ÍBV í Eyjum á fimmtudagskvöld.

Sjá einnig: Bjarni Jóhannsson hættur með ÍBV

Óskar Örn Ólafsson, formaður knattspyrnudeildar ÍBV, hefur ekki viljað tjá sig um málið eftir að tilkynningin var send og hafði lítið um það að segja í samtali við Vísi í dag.

„Ég vil helst ekki tjá mig um ástæður þess að hann hætti. Það verður að koma frá honum sjálfum,“ sagði Óskar en Bjarni fór sjálfur fram á að hætta með liðið.

„Við vildum halda honum,“ sagði Óskar.

Ekki hefur náðst í Bjarna Jóhannsson síðan að hann steig til hliðar sem þjálfari ÍBV.