Ólafur Arnalds og Sölvi Blöndal taka við tónlistinni hjá Senu

Kolbeinn Tumi Daðason skrifar 28. júlí 2016 12:26

Tónlistarmennirnir Ólafur Arnalds og Sölvi Blöndal fara fyrir nýju útgáfufyrirtæki sem hefur tekið yfir tónlistarhluta Senu. Um er að ræða mjög stóran hluta af allri útgefinni íslenskri tónlist og um tímamótabreytingu að ræða, ekki ósvipaðri og þegar Sena tók við tónlistinni af Skífunni á sínum tíma.

Ólafur segir að nýja útgáfufyrirtækið muni einbeita sér að nýrri útgáfu og sömuleiðis halda utan um alla þá tónlist sem fyrir var hjá Senu.

Ólafur og Sölvi verða í stjórn nýja fyrirtækisins sem hefur ekki fengið nafn. Segir Ólafur að þeir ætli að flýta sér hægt í ferlinu, byrja á því að kynna það fyrir almenningi í dag enda snerti það ansi marga í tónlistarheiminum hér á landi. Óhætt er að segja að tónlistarútgáfa hafi tekið stakkarskiptum undanfarin ár þar sem hefðbundin plötusala hefur hrapað og útgáfa orðið stafrænni.

„Í gamla daga þurfti að vera plata, núna er meira um smáskífur og YouTube myndbönd,“ segir Ólafur

„Við þurfum að stilla útgáfuna inn á þann bransa og sýna af hverju ungt fólk ætti að vinna með okkur.“

Ólafur og Sölvi ættu að þekkja vel hvað tónlistarmenn í útgáfuhug eru að hugsa enda verið virkir í íslenskum tónlistarheimi undanfarin ár og sömuleiðis á erlendri grundu. Sölvi er þekktur sem trommari rappsveitarinnar Quarashi, þar sem hann semur og útsetur mörg laga sveitarinnar. Ólafur er hins vegar sólólistamaður og hefur meðal annars unnið til BAFTA-verðlauna.

Sex koma að kaupunum

Í teyminu sem kemur að nýja fyrirtækinu eru auk Sölva þeir Sigurjón Sighvatsson kvikmyndaframleiðandi, Henrik Biering tónlistarmaður, Reynir Harðarson, einn af stofnendum CCP og fjárfestir, og Jón Diðrik Jónsson, meirihlutaeigandi í Senu. Ólafur segir hugmyndina hafa kviknað hjá þeim Sölva í upphafi árs og síðan hafi átt sér stað mörg samtöl og haldnir margir fundir. Svo small allt saman og nú séu hjólin farin að snúast. Sölvi segir þetta ástríðuverkefni og sama er að heyra á Ólafi.

Tónlistarmaðurinn segir mikilvægt að huga vel að útgáfu nýrrar tónlistar og það gildi um alla tónlistarmenn. Það þýði ekki að lifa á fornri frægð heldur verði að halda hlutunum við, líkt og þegar húsi sé viðhaldið. Það þurfi að mála það og skipta um parket. Hið sama gildi um útgáfu tónlistar. Þeir séu með margar góðar hugmyndir en fyrst verði að kynna málið vel fyrir hagsmunaaðilum, sem séu margir, enda margir tengdir og umhugað um íslenska tónlist.

Breytingin hvað Senu snertir er sú að tónlistarhlutinn færist út úr fyrirtækinu og yfir til nýja fyrirtækisins. Annars er Sena óbreytt er varðar viðburðarstjórnun, kvikmyndir, tölvuleiki og annað sem fyrirtækið hefur komið nálægt. Kaupverðið hefur ekki verið gefið upp.

Tónlist