Mamma Jóa Berg: Tilvonandi tengdasonur fékk ekkert að borða útaf leiknum í Bern

Kolbeinn Tumi Daðason skrifar 29. júní 2016 12:15

Jóhann Berg fagnar jöfnunarmarkinu í Bern í undankeppni HM 2014. Vísir/Valli

Íris Gunnarsdóttir, móðir landsliðsmannsins Jóhanns Berg Guðmundssonar, segir misjafnt hvernig hún sé stemmd á leikdag. Stundum sé hún róleg en annars með í maganum. Íris ræddi við strákana í Bítinu á Bylgjunni í morgun en hún hefur fylgst grannt með stráknum sínum í Frakklandi eins og öll fjölskyldan.

„Stundum er maður á bak við hurð, uppi á stól eða jafnvel með smá magapínu. En oft á tíðum er ég bara róleg,“ segir Íris. Það fari gjarnan eftir mikilvægi leiksins en ekki síður hvernig hljóðið sé í syninum sem hún ræðir gjarnan við á leikdag.

Íris upplýsir að Jóhann hafi stigið sín fyrstu skref á knattspyrnuvellinum í appelsínugulum búningi Fylkis.

„Hann var þar eitt ár, eitt tímabil. Sex eða sjö ára,“ segir Íris en eins og kunnugt er spilaði Jóhann með Breiðabliki upp yngri flokka þar sem hann hélt á vit ævintýranna hjá AZ Alkmaar í Hollandi.

„Hann var mjög efnilegur, alveg frá upphafi. Hann var mjög snöggur og hafði mikinn metnað. Lífið var bara fótbolti frá því hann byrjaði að tala.“

Fótboltabakterían segir Íris að megi að einhverju leyti rekja til föður síns, afa Jóhanns. Hún hafi sjálf horft með honum á enska boltann í gamla daga, þá aðallega leik Manchester United sem Gunnar studdi. Jóhann hafi oftar en ekki bæst í hópinn.

Jóhann Berg, Gylfi Þór, Aron Einar og Hannes Þór.Vísir/Vilhelm

Fyrsta matarboðið hjá tengdó

Minningarnar af ferli Jóhanns eru vafalítið margar hjá fjölskyldunni. Upp úr stendur þó líklega 4-4 jafnteflið gegn Sviss í Bern þar sem Jóhann skoraði einhverja fallegustu þrennu sem sést hefur. Mörkin hvert öðru glæsilegra í leik þar sem okkar menn sneru við 4-1 stöðu í 4-4 jafntefli. Jóhann tryggði stigið með langskoti í blálokin og hefur stundum verið kallaður Jóhann Bern í staðinn fyrir Jóhann Berg síðan.

„Við misstum okkar algjörlega þar,“ segir Íris sem hafði boðið í mat þetta sama kvöld

„Tengdasonur minn tilvonandi var í fyrsta skipti í mat. Þetta átti að vera mjög rólegt og skemmtilegt kvöld,“ segir Íris.

„Svo vorum við fjölskyldan komin upp á stól. Það fór ekkert fyrir eldamennsku og hann fékk ekkert að borða greyið,“ bætir hún við hlæjandi. Vel hafi þó verið hugsað um hann síðan.

Sár eftir skotið í skeytin

Ekki munaði miklu að Jóhann skoraði enn eitt draumamarkið þegar boltinn small í samskeytunum snemma leiks gegn Austurríki. Nokkrir sentimetrar og við værum að tala um eitt af mörkum Evrópumótsins.

„Hann var náttúrulega mjög sár yfir því að hafa ekki getað sett hann. Heppni var ekki með honum. Þetta var frábært skot og hefði verið mark leiksins, og þó víðar væri leitað,“ segir Íris. Fjölskyldan sá leikinn í Nice og stefndi heim en hætti við.

„Það var spurningin hvort við ættum að fara eða vera,“ segir Íris. Síðar um daginn hafi komið í ljós að hve erfitt yrði að komast aftur út til Parísar fyrir Frakklandsleikinn á sunnudaginn.

„Ég hef sennilega ekki getað fyrirgefið mér hefði ég ekki komist á næsta leik.“

Jóhann Berg fagnar á Stade de France á mánudagskvöldið.Vísir/Vilhelm

Í lyfjapróf eftir Englandsleikinn

Íris upplýsir að hún sé bjartsýn fyrir Frakklandsleikinn líkt og fyrir Englandsleikinn.

„Ég var einhvern veginn sallaróleg fyrir þann leik. Ég veit og heyri á strákunum hve vel stemmdir þeir eru fyrir þetta verkefni. Þetta hefur verið draumur í langan tíma hjá þessum strákum. Þeir eru með toppstykkið í lagi,“ segir Íris.

Nú sé fókusinn á næsta leik. Ísland muni spila sinn bolta eins og gegn Englandi þar sem auðvitað allt hafi gengið upp.

„Ég hef mjög góða tilfinningu fyrir næsta leik.“

Íris ræddi við Jóhann eftir sigurinn í Nice. Þá var kantmaðurinn að bíða eftir því að fara í lyfjapróf. Lyfjaeftirlit tekur leikmenn af handhófi úr liðunum að leikjum loknum.

„Hann sat rólegur og beið. Ég spyr eins og alltaf hvernig honum líði og það er alltaf stutt og gott svar. Mér líður bara vel,“ segir Íris. Eftir sturtuna séu strákarnir okkar komnir niður á jörðina. Hún sé hins vegar að átta sig á því, eftir því sem á dvölina í Frakklandi hefur liðið, hversu miklar hetjur strákarnir eru.

„Þeir eru ekki bara að hlaupa. Þeir þurfa líka að hugsa, sparka og hafa lítinn tíma. Þetta eru þvílíkar hetjur. Frábærir afreksmenn.“

Að neðan má sjá viðtal við Jóhann Berg eftir þrennuna í Bern haustið 2013.

EM 2016 í Frakklandi

Tengdar fréttir

Mest lesið

Fleiri fréttir