Kolbeinn vann fleiri skallabolta en allt portúgalska liðið

Bakarasonurinn Kolbeinn Sigþórsson fór svo sannarlega á kostum í háloftunum í Saint-Étienne í kvöld. Víkingurinn uppaldi vann hvorki fleiri né færri en átján skallabolta í leiknum í kvöld en Portúgalar höfðu samanlagt, allir ellefu, betur í sautján skallaeinvígum.

Kolbeinn spilaði í fremstu víglínu með Jóni Daða Böðvarssyni og vann boltann aftur og aftur í loftinu en seinni boltinn hafnaði hins vegar oftar en ekki hjá Portúgölum. 

Frábær frammistaða hjá Kolbeini sem stóð sig frábærlega í kvöld eins og strákarnir okkar allir sem einn.