Mark Elmars hjálpaði AGF að komast í kjörstöðu

Theodór Elmar Bjarnason skoraði fyrra mark AGF í 0-2 sigri á Aalborg í undanúrslitum dönsku bikarkeppninnar í dag.

Þetta var fyrri leikur liðanna en sá seinni fer fram á fimmtudaginn eftir viku á heimavelli AGF. Í hinni undanúrslitarimmunni eigast FCK og Bröndby við.

Elmar kom AGF yfir á 22. mínútu og um miðjan seinni hálfleik bætti Duncan öðru marki við.

Þetta var annað mark Elmars í bikarkeppninni í ár en hann skoraði einnig í 0-3 sigri á SönderjyskE í 8-liða úrslitunum.

Elmar er á sínu fyrsta tímabili með AGF en hann kom til liðsins frá Randers síðasta sumar.