Föstudagurinn bjargaði stigi á föstudegi fyrir Rúnar

Rúnar Kristinsson og lærisveinar hans í Lilleström gerðu jafntefli gegn Haugesund á útivelli í norsku úrvalsdeildinni í fótbolta í kvöld, 2-2.

Haugesund komst yfir í leiknum með marki Eirik Mæland á 10. mínútu en gestirnir jöfnuðu metin, 1-1, á 34. mínútu með marki Simen Kind Mikalsen og þannig stóðu leikar í hálfleik.

Torbjörn Agdestein kom Haugesund aftur yfir með marki á 52. mínútu en nígerskí framherjinn með frábæra nafnið, Fred Friday, bjargaði stigi fyrir Lilleström með jöfnunarmarki á 80. mínútu, 2-2.

Árni Vilhjálmsson var í byrjunarliði Lilleström og spilaði 80 mínútu áður en hann var tekinn út af.

Lilleström er eftir leikinn í níunda sæti með sex stig en það er aðeins búið að vinna einn af fyrstu fimm leikjum tímabilsins.

Það er, aftur á móti, aðeins búið að tapa einum af fyrstu fimm en gera þrjú jafntefli.