Mikilla breytinga að vænta með nýjum iPhone

iPhone 7S sem væntanlegur er árið 2017 mun líklega vera með glerhjúp, vera léttari og styðjast við þráðlaust hleðslutæki og heyrnartól. Þessu spáir Ming-Chi Kuo, greiningaraðili hjá KGI Securities, sem hefur reynst sannspár um hvað er í vændum hjá Apple.

Samkvæmt spám Kuo mun iPhone 7S síminn verða með glerhjúp eins og iPhone 4 og 4S voru með sem mun gera símann léttari. Skjárinn á stærri útgáfu símans, 7S plus, mun verða 5,8 tommur í stað 5,5 tomma. Apple mun losa sig við innstungu fyrir heyrnartól og hleðslutæki til að gera símann þynnri og í staðinn munu notendur þurfa að styðjast við þráðlaus tæki.

Kuo spáir því einnig að Apple muni bæta við andlitsþekkingartækni í nýja símann sem getur aukið öryggi umfram þumalfaratæknina sem iPhone 6 og 6S styðjast við. Kuo spáir þessum breytingum fyrir þar næstu gerð af iPhone en hins vegar er líklegt að eitthvað af þessari tækni muni finnast í nýjustu gerðinni, iPhone 7, sem væntanleg er í haust.

Fréttin birtist fyrst Fréttablaðinu 29. mars