Laumuðu sér inn á æfingu hjá Barcelona og fengu höfðinglegar móttökur | Myndband

Barcelona létu þrjá stráka sem laumuðu sér inn á æfingu liðsins í gær ekki trufla undirbúninginn fyrir stórleikinn gegn Arsenal í Meistaradeild Evrópu í kvöld.

Í stað þess að kalla örygissverði til fengu strákarnir höfðinglegar móttökur. Þeir fengu að æfa með stórstjörnum Barcelona og taka myndir af sér með leikmönnunum, sem skemmtu sér konunglega yfir öllu saman.

Tveir strákanna eru frá Ekvador og einn frá Úrúgvæ. Allir búa þeir í Malaga en voru í stuttri heimsókn í Barcelona, samkvæmt spænskum fjölmiðlum.

Þeir náðu að komast fram hjá öryggisvörðum á æfingasvæði Barcelona og fengu að leika sér með leikmönnum liðsins í nokkrar mínútur áður en þeim var fylgt í burtu.