Skildi af hverju ég er svona þrjósk og þrá

„Markmiðið með námskeiðinu er að konur segi sögu einhverrar formóður sinnar eða frá ákveðnu þema úr lífi fleiri en einnar. Þær vinna auðvitað heimildarvinnu fyrst og sumar skrifa mikið í tengslum við verkefnið en þær eiga að segja söguna blaðalaust.“

Þannig lýsir Sigurbjörg Karlsdóttir tilgangi námskeiðsins Til fundar við formæður sem hún og Sigurborg Kr. Hannesdóttir eru að fara af stað með í næstu viku.

Námskeiðsdagar eru 8., 15. og 22. febrúar, milli klukkan 18.30 og 21.30. Þar fá þátttakendur ákveðna leiðsögn og þjálfun í að standa upp og segja sögu og enda á sjö til tíu mínútna frásögn.

Sigurborg segir námskeið þeirra Sigurbjargar hafa sprottið upp úr áhuga á sögum þeirra eigin formæðra.

„Það var gefandi að fræðast um þessar konur og í gegnum þær kynntumst við sjálfum okkur betur.“

Það tekur Sigurbjörg undir. „Þegar ég fór að skoða sögu ömmu minnar og langömmu skildi ég af hverju ég er svona þrjósk og þrá og gefst aldrei upp.“



Þær stöllur ásamt Ragnheiði Þóru Grímsdóttur og Magneu Einarsdóttur verða með sögustundir í Sívertsenhúsi í Hafnarfirði á Vetrarhátíð föstudagskvöldið 5. febrúar, klukkan 20 og aftur klukkan 21.

Inn í sögur af formæðrum flétta þær sögulegum punktum, taka lagið þeim til heiðurs og Magnea ætlar að kveða. Allir eru velkomnir endurgjaldslaust, bæði konur og karlar og ekki þarf að skrá þátttöku fyrirfram.

Á námskeiðið þarf hins vegar að panta hjá Sigurborgu, sigurborg@ildi.is eða Sigurbjörgu, sibbak@simnet.is.