Apple gæti þurft að greiða andvirði billjón króna vegna vantalinna skatta

Samkvæmt Bloomberg eru töluverðar líkur á því að tæknirisinn Apple eigi von á risastórum reikningi vegna vantalinna opinberra gjalda í Evrópu. Upphæðin nemur að minnsta kosti átta milljörðum dollara sem er andvirði rúmlega billjón íslenskra króna. Ekki er loku fyrir það skotið að hún verði hærri þegar upp er staðið.

Apple, sem er stærsta fyrirtæki heimsins, er talið hafa reynt að nota írsk dótturfélög sín til að komast hjá því borga skatta af tekjum sem myndast utan Bandaríkjanna. Nefnd á vegum framkvæmdastjórnar Evrópusambandsins hefur skoðað málið á undanfarin tvö ár.

Rúmlega helmingur tekna Apple stafar af viðskiptum utan Bandaríkjanna en erlent skatthlutfall þess nemur aðeins tæpum tveimur prósentum.

Apple er ekki eina bandaríska fyrirtækið sem liggur undir grun um að stunda slíkt undanskot en framkvæmdastjórnin er einnig að skoða mál McDonalds, Amazon og Starbucks.