Þú þarft að hlaupa í átt að markmiðunum þínum

Loksins, loksins lét sólin sjá sig. Það er ótrúlegt hvað allir verða léttari í lund og líta jákvæðari augum á lífið um leið og sú gula lætur sjá sig, þó það sé ekki nema einn dag. Eitt af því sem ég elska við hækkandi sól er að sjá fólk stunda líkamsræktina utandyra, og er hlaupaíþróttin þar hvað mest áberandi.

Þegar byrjar að vora fjölgar keppnishlaupum á vegum ýmissa fyrirtækja og samtaka og því margir sem setja stefnuna á að taka þátt í einhverjum af þeim hlaupum. Þessi hlaup eru eins misjöfn og þau eru mörg, allt frá 5 kílómetra litahlaupi, sem verður hlaupið í fyrsta skipti í sumar og undirrituð getur ekki beðið eftir að fá að upplifa, yfir í Esjuhlaup, Laugavegshlaup og Reykjavíkurmaraþon.

Undirbúa þarf líkamann fyrir keppnishlaup, hvort sem maður ætlar að hlaupa stystu vegalengdina eða þá lengstu. Því er gott að setja sér markmið varðandi hlaupaæfingarnar og skiptir máli hvernig markmið maður setur sér til þess að eiga sem mestan möguleika á því að ná þeim.

Skýr markmið

Mikilvægt er að ekki sé hægt að túlka markmiðin eða rökræða við sjálfan sig þegar litli púkinn fer af stað í höfðinu á manni. Gerðu æfingaáætlun og ákveddu fyrirfram hversu langt þú ætlar að hlaupa á hverri æfingu og hversu margar æfingarnar eiga að vera í hverri viku.

Mælanleg markmið

Mikilvægt er að vita nákvæmlega hverju maður ætlar að ná og hvenær maður hefur náð því. Ef þú hefur aldrei hlaupið í keppnishlaupi áður getur verið ágætt markmið bara að klára hlaupið. Ef þú ert hins vegar reyndur hlaupari getur verið gott að stefna á að hlaupa á einhverjum ákveðnum tíma.

Raunhæf markmið

Eins hvetjandi og það er að setja sér markmið og ná þeim þá getur það alveg farið með mann þegar maður nær þeim ekki. Því er mikilvægt að skemma ekki fyrir manni áður en maður leggur af stað með markmiðum sem engin leið er að ná. Ef þú hefur aldrei hlaupið 10 kílómetra, ekki þá skrá þig í hálft maraþon. 

Tímarammi markmiða 

Settu þér bæði skammtíma- og langtímamarkmið. Skammtímamarkmiðin eiga að vinna að langtímamarkmiðinu. Skammtímamarkmiðið getur verið að hlaupa í fyrsta skipti í 10 kílómetra á meðan langtímamarkmiðið getur verið að hlaupa heilt maraþon eftir nokkur ár.

Framvindan er áríðandi

Settu þér framvindumarkmið frekar en niðurstöðumarkmið. Það er afar auðvelt að setja sér markmiðið að geta hlaupið maraþon í lok sumarsins en það er enn auðveldara að vera engu nær því að mánuði loknum, því leiðin er afar óljós. Slíkt markmið kallast niðurstöðumarkmið. Mun betra er að setja sér framvindumarkmið eins og að hlaupa tvisvar sinnum í viku því þau markmið eru skýr, mælanleg og raunhæf. Ef maður nær svo framvindumarkmiðinu er maður svo líka kominn talsvert nær því að ná að hlaupa maraþon.

Skrifleg markmið

Skrifaðu markmiðin þín niður og hafðu þau sjáanleg. Þannig er mun auðveldara að minna sig á það á hverjum degi að vinna að þeim.