Samin til að gleðja og skemmta

„Það áhugaverða við þessa tónleika er að við erum að flytja þar verk sem heyrast mjög sjaldan, að undanskildu einu þeirra sem nefnist Nautið á þakinu. Ég sagði á æfingu í morgun að það væri greinilegt að þessi tónlist hefði verið samin til að gleðja og skemmta.“

Þetta segir Einar Sveinbjörnsson klarinettuleikari um tónleika Kammersveitar Reykjavíkur í Norðurljósasal Hörpu á morgun, sunnudag, klukkan 17.

„Við ætlum að kynna hópinn Les Six, tónskáldin sex sem hófu samstarf eftir fyrri heimstyrjöldina. Þá voru nýir tímar að renna upp og listamenn kepptust við að koma með eitthvað nýtt. Kúbisminn varð til í myndlistinni og tónskáldin voru búin fá nóg af síðrómantík aldarinnar á undan og vildu koma með alveg nýjan tón,“ lýsir Einar.

„Afrakstur sexmenninganna, sem allir voru í kringum þrítugt, er stutt verk og stílhrein, mikið af leikhústónlist í samvinnu við súrrealistana Cocteau og Satie sem voru eiginlega leiðtogar þeirra.“

Tónleikarnir eru haldnir í samvinnu við franska sendiráðið. Stjórnandi er Pejman Memarzadeh.

Einleikarar eru Ástríður Alda Sigurðardóttir og Anna Guðný Guðmundsdóttir píanóleikarar og Eiríkur Örn Pálsson trompetleikari. Bergþór Pálsson er einsöngvari í tveimur verkum og hefur verið að æfa sig í frönskunni!

Hljómsveitina skipa 29 manns og verður fiðluleikarinn Cécile Jacquillat, ekkja Jean-Pierre Jacquillat hljómsveitarstjóra, með í hópnum.