Bækurnar finnast og og Björt kemst í ró

Björt er í pössun hjá afa sínum og ömmu í sumarbústað, en þar er lítið við að vera og henni leiðist. Í bústaðnum eru engin nútímatæki eins og tölvur og snjallsímar. Afinn og amman reyna að hafa ofan af fyrir henni, en hún gerist æ óþægari. Að lokum finnast bækur í bústaðnum og Björt kemst í ró.

Þannig er efni sýningarinnar Björt í sumarhúsi lýst. Þar leikur Una Ragnarsdóttir titilhlutverkið, Valgerður Guðnadóttir og Jón Svavar Jósefsson eru í hlutverki ömmunnar og afans og Bragi Bergþórsson er í hlutverki hlaupagikks, ókindar og draugs.

Björt í sumarhúsi verður sýnd í Tjarnarbíói á morgun, laugardag, klukkan 15 og á sama tíma um næstu helgi. Tónlistin er eftir Elínu Gunnlaugsdóttur og textar eftir Þórarin Eldjárn. Þeir byggjast á ljóðum úr bókinni Gælur, fælur og þvælur.

Kristína Berman hefur skapað söngleiknum fjörlega umgjörð, Jóhann Bjarni Pálmason sér um lýsingu og Ágústa Skúladóttir leikstýrir. Töfrahurð og Óperarcticfélagið standa að baki uppsetningunni.