Hugurinn ber þig alla leið

Hugurinn er ansi merkilegt fyrirbæri og töluvert öflugri en hann virðist í fyrstu. Hvernig getur heilinn sem er 75% vatn stjórnað lífi okkar á svona magnaðan hátt, er það heilinn sem stjórnar eða við sjálf? Hvað erum við þá? Er hugurinn sama og heilinn?

 

Þessum spurningum verður svo sem ekki svarað hér í þessum pistli þó að þetta séu áhugaverðar spurningar sem án efa eru ýmis og ólík svör við.

 

Mig langar aftur á móti að veita huganum örlitla athygli og því sem hann getur gert. Þetta er nefnilega allt í hausnum á okkur. Hugsanir okkar endurspegla gjörðir og gjörðirnar endurspegla sjálfið. Sem fullorðnar manneskjur tökum við ábyrgð á okkar eigin hugsunum og þar af leiðandi okkar eigin gjörðum. Séum við ekki sátt í okkar eigin hugarheimi getur lítið gott komið út úr því. En hvernig getum við breytt hugsunum okkar og stigið skrefin í átt að farsælla lífi?

 



Hugleiðsla er eitt af þeim tækjum sem hægt er að nota í þessu verkefni lífsins. Hún er ekki einungis tæki til þess að ná andlegu jafnvægi, hugarstyrk og hvíld, heldur einnig tæki til þess að ná árangri, sjá fyrir sér bestu mögulegu útkomuna og verða besta útgáfan af sjálfinu.

 

Til þess að ná hugleiðsluástandi þarftu að vera í umhverfi sem þér líður vel í.

Komdu þér fyrir í þægilegri stöðu, samt ekki það þægilegri að þú sofnir. Færðu athyglina að andardrættinum, hlustaðu, upplifðu og skynjaðu andrúmsloftið fara inn og út úr líkamanum í gegnum nefholið.

 

Þegar þú finnur að líkaminn er kominn í ró, leyfðu þér þá að dreyma, sjáðu fyrir þér lífið eins og þú vilt að það sé. Eru einhver ákveðin verkefni fram undan sem þú vilt sjá fara á einhvern ákveðinn veg?

 

Sjáðu fyrir þér niðurstöðuna sem þú vilt fá út úr stöðunni. Leyfðu þér að dvelja og dreyma í nokkrar mínútur áður en þú kemur til baka. Dragðu djúpt að þér andann, fylltu hugann af jákvæðum hugsunum, taktu á móti deginum með sól í sinni og mundu að þú ert þinn eigin og eini vegartálmi.