Verulega er farið að hvessa á Suðurlandi og reiknað með því að lægðin færist í vesturátt og nær suðvesturhorninu og höfuðborgarsvæðinu eftir því sem líður á kvöldið. Um 300 björgunarsveitarmenn sinna nú lokunum fyrir vegagerð og lögreglu eða eru í viðbragðsstöðu í húsi.
Ólöf Snæhólm Baldursdóttir, upplýsingafulltrúi hjá Landsbjörg, segir björgunarsveitarfólk hafa sinnt einhverjum verkefnum fyrir austan fjall og á Suðurnesjum í dag auk Vestmannaeyja. Þau hafi þó ekki verið mörg en fólk sé í startholunum fyrir kvöldið enda bendi flest til þess að spár rætist.
Ólöf segir stærstan hluta björgunarsveitarfólks á Suðurlandinu og höfuðborgarsvæðinu en svo raði fólk sér eftir því sem veðrið færist.
