Fjögurra ára keppnisbann knapans Þorvaldar Árna Þorvaldssonar hefur verið staðfest af áfrýjunardómstól Íþrótta- og Ólympíusambandsins. Þetta staðfestir Skúli Skúlason, formaður lyfjaeftirlits ÍSÍ, við Vísi.
Þorvaldur Árni var 1. október dæmdur í fjögurra ára keppnisbann eftir að amfetamín fannst í þvagsýni hans sem tekið var eftir keppni í tölti á Reykjavíkurmeistaramóti Fáks í Víðidal í maí.
Lyfjaeftirlitið krafðist þess að Þorvaldur yrði dæmdur í átta ára bann en dómstóllinn komst að þeirri niðurstöðu að dæma hann í fjögurra ára bann.
Þetta er í annað sinn á rúmu ári sem Þorvaldur Árni er dæmdur í keppnisbann, en í fyrra fékk hann þriggja mánaða keppnisbann fyrir sama brot. Sá dómur var mildaður niður í einn mánuð.
Sjá einnig:Verðlaunaknapi féll aftur á lyfjaprófi
Sjá einnig:Segir amfetamínið ekki haft nein áhrif á árangurinn
