Nærri 20 stiga frosti spáð á Akureyri

Talsvert frost verður á landinu næsta föstudag þegar snýst í vestan og suðvestan, að því er segir í spá Veðurstofu Íslands. Íbúar Norðausturlands munu heldur betur finna fyrir kuldanum en átján stiga frosti er spáð á Akureyri um níuleytið á föstudagsmorgni og fjórtán stiga frosti á Húsavík.

Átján stiga frosti er jafnframt spáð á Holtavörðuheiði á sama tíma, fjórtán stiga frosti á Egilsstöðum og fimm stiga frosti á höfuðborgarsvæðinu. Stöku él er spáð vestanlands og við norðurströnd landsins.

Frost fer þó minnkandi síðdegis, samkvæmt spánni, og um 0 til átta stiga frosti er spáð um landið á laugardag.