Einhverra hluta vegna kallar stjórinn Chris Smalling alltaf Michael. Hann gerði það á undirbúningstímabilinu og svo aftur eftir Meistaradeildarleik United og CSKA Moskvu í gær.
„David de Gea bjargaði okkur með góðri vörslu og Michael Smalling bjargaði okkur líka," sagði Van Gaal í gær.
Smalling hefur mátt þola nokkra stríðni síðan Van Gaal kallaði hann Mike síðasta sumar og það á ekkert eftir að minnka núna.
„Leikmennirnir kalla mig ekkert Mike en margir stuðningsmenn eru farnir að gera það. Og það út um allan heim. Meira að segja þegar ég var í Rússlandi var hópur manna að kalla: Mike, Mike, Mike," á mig," sagði Smalling brosandi en hann tekur þessu létt.
Hér að neðan má sjá er Van Gaal klúðraði þessu í fyrra skiptið.
