Kári: Skemmtilegra að spila með landsliðinu en í Meistaradeildinni

Kári Árnason verður væntanlega í lykilhlutverki þegar Ísland mætir Lettlandi á Laugardalsvelli á laugardaginn og svo Tyrklandi ytra á þriðjudag.

Þetta eru síðustu tveir leikir Íslands í undankeppni EM 2016 en strákarnir eru þegar búnir að tryggja sér sæti í lokakeppninni í Frakklandi.

Kári hefur gert það gott með sænska liðinu Malmö sem nú stendur í ströngu í riðlakeppni Meistaradeildar Evrópu. Kári kom til Svíþjóðar í sumar eftir að hafa verið á mála hjá Rotherham í Englandi um árabil.

Hann segir að hann hafi upplifað góða tíma í Malmö. Liðið sé í stöðugri uppbyggingu og þrátt fyrir gengi liðsins í deildinni heima fyrir hafi valdið vonbrigðum þá sé það mikið ævintýri að taka þátt í Meistaradeildinni.

„Það lítur út fyrir að við þurfum að koma okkur aftur í Evrópukeppnina með bakleið í gegnum bikarinn. En svona lagað vill oft gerast, lið sem eru í Meistaradeildinni gefa aðeins eftir í deildarleikjunum og það hefur gerst hjá okkur.“

Malmö hafði betur gegn Red Bull Salzburg og skoska liðinu Celtic í forkeppni Meistaradeildarinnar og er nú í riðli með Real Madrid, PSG og Shakhtar Donetsk.

„Eftir að við spiluðum við Celtic fyrir framan 60 þúsund manns þá áttum við leik nokkrum dögum síðar gegn Häcken fyrir framan þrjú þúsund manns,“ lýsir Kári.

„Það var versti leikur sem ég hef séð nokkurt lið spila. Við enduðum með því að tapa þeim leik, 1-0. Það er stór munur á því að spila Evrópuleiki og svo deildarleiki heima. En það er mikilvægt fyrir okkur að komast aftur í Evrópukeppnina á næsta ári.“

„Það hefur verið vandamál allt tímabilið að gíra okkur upp í litlu leikina. Við erum góðir á heimavelli og allir vita að við erum með besta liðið í deildinni. Við stjórnum leikjunum gegn öllum sterku liðunum, erum mikið með boltann en eigum í erfiðleikum með að skora.“

Kári segir að það hafi verið ansi fjarlægur draumur fyrir sig að spila gegn bestu leikmönnum heims í Meistaradeild Evrópu þegar hann var að spila með Rotherham í neðri deildunum á Englandi.

„Þegar ég fékk tækifæri til að fara til Malmö í sumar var þessi möguleiki fyrir hendi, þó svo að maður vissi að það yrði erfitt að komast í riðlakeppnina. En það tókst og við áttum skilið að komast þangað.“

Normaðurinn Åge Hareide er stjóri Malmö en hann á langan feril að baki og þykir útstjónarsamur stjóri. „Hann er mjög klókur og minnir um margt á Lars á margan hátt,“ segir Kári.

Hann játar því að það hafi verið skemmtileg lífreynsla að spila gegn leikmönnum eins og Cristiano Ronaldo sem skoraði bæði mörk Real í 2-0 sigrinum á Malmö í Svíþjóð í síðustu viku.

„Það er gaman að fá að mæla sig gegn þeim bestu. Hann spilaði líka frammi stærstan hluta leiksins og það var gaman að kljást við hann. Hann skoraði að vísu tvö mörk en ég gat lítið gert í því fannst mér.“

Þrátt fyrir að tilefnið sé stórt og andstæðingarnir sömuleiðis segir Kári að allt slíkt gleymist fljótt. „Maður kíkir aðeins á þá í göngunum áður en liðin ganga út á völlinn en allt slíkt hverfur um leið og dómarinn flautar til leiks.“

Og hann segir að honum þykir í raun ekkert skemmtilegra en að koma heim og spila með íslenska landsliðinu, hvað þá á Laugardalsvelli.

„Þetta er miklu skemmtilegra en að spila í Meistaradeildinni, ef ég á að segja alveg eins og er. Ég myndi frekar velja þessa leiki með þessum liðsfélögum fram yfir leiki í Meistaradeildinni.“

„Það er aldrei erfitt að gíra sig upp í þessa leiki, þó svo að við séum búnir að tryggja okkur á EM. Málið er mjög einfalt - við ætlum að vinna riðilinn okkar og til þess þurfum við að vinna hugsanlega báða leikina [gegn Lettlandi og Tyrklandi].“