Gylfi Þór: Ekki hægt að setjast á rassinn og hætta að vinna fyrir liðið

Gylfi Þór Sigurðsson verður í eldlínunni með íslenska karlalandsliðinu í fótbolta á laugardaginn þegar liðið mætir Lettlandi í næst síðasta leik undankeppni EM 2016.

Strákarnir okkar eru nú þegar komnir í lokakeppnina en keppast nú að því að vinna síðustu tvo leikina gegn Lettum og Tyrkjum til að reyna að vera í þriðja styrkleikaflokki þegar dregið verður í riðlakeppni EM í Frakklandi.

"Við höfum verið vanir því að vera búnir að klúðra riðlinum á þessum tíma. Þetta er því sérstök tilfinning," sagði Gylfi Þór við Vísi fyrir æfingu landsliðsins í dag.

Gæti skipt sköpum

"Þetta eru tveir mikilvægir leikir því við viljum vera í þriðja styrkleikaflokki og eini möguleikinn á því er að vinna báða leikina. Þjálfararnir eru eitthvað búnir að vera reikna þetta út og ég læt þá alveg um það. Eina sem við getum gert er að vinna leikina og við einbeitum okkur að því."

Í fyrsta sinn verða 24 lið á EM og fara 16 lið í útsláttarkeppnina.

"Það gæti skipt sköpum að vera með eitt lakara lið í riðlinum því einn sigur gæti komið okkur í 16 liða úrslit. Það kemur mönnum alveg í gang að klára dæmið hérna heima og vonandi hjálpar það okkur fyrir Frakkland," sagði Gylfi Þór.

"Það væri auðvitað þægilegt að vera ekki með 2-3 stórum þjóðum í riðli. Það eru samt engin léleg lið í lokakeppni EM og því væri gott að vera í þriðja styrkleikaflokki."

Óskuðu honum allir til hamingju

Gylfi Þór spilar með Swansea í ensku úrvalsdeildinni eins og allir vita, en liðið er fullt af landsliðsmönnum öflugra þjóða eins og Englands, Gana og Póllands. Hvernig tóku liðsfélagarnir í að litla Ísland væri komið á stórmót?

"Strákarnir óskuðu mér allir til hamingju með að vera kominn á EM. Þeir eru búnir að fylgjast með gangi mála síðustu tvö ár þannig þeir bjuggust kannski við þessu. Það er samt fáránlegt að land eins og Ísland sé loksins komið í lokakeppnina," sagði Gylfi Þór.

Swansea byrjaði af krafti í ensku úrvalsdeildinni en hefur nú ekki unnið í fjórum leikjum í röð.

"Við byrjuðum ágætlega en síðan komu tvenn úrslit sem voru ekki góð. Við vorum ekki líkir sjálfum okkur gegn Watford og Southampton en náðum í ágætis stig á móti Tottenham og Everton á heimavelli. Everton er búið að sýna að það er með gott lið líkt og Tottenham," sagði Gylfi Þór sem hefur heldur ekki farið jafn vel af stað núna og í fyrra.

Gylfi er búinn að skora eitt mark og leggja upp eitt í fyrstu átta umferðum úrvalsdeildarinnar, en á sama tíma í fyrra var hann búinn að skora eitt og leggja upp sex.

"Þó ég hafi ekki verið að skora hef ég verið ágætur," sagði Gylfi Þór um eigin frammistöðu, en hann saknar framherjans frá Fílabeinsströndinni, Wilfried Bony.

"Það er öðruvísi að vera ekki með Bony frammi því við tengdum mjög vel saman. Við erum að spila með Andre Ayew sem er að spila mikið inn á miðjuna þannig það er minna pláss fyrir mig."

"Það eru bara átta leikir búnir í deildinni og nóg eftir. Vonandi fara mörkin að koma og stoðsendingarnar líka og þá förum við að vinna leiki."

Gott að fá traustið

Gylfi segir markaleysið ekki hafa áhrif á sig. Hann nýtir það frekar sem hvatningu til að fara að skora meira og leggja upp.

"Það er bara meiri hvatning en annað að koma sér í gang. Ég man það alveg í fyrra að það kom kafli þar sem ég lagði hvorki upp né skoraði í sex leikjum. Þetta gerist stundum, en svo fer boltinn í mann og inn og þá fer allt í gang. Mér hefur gengið samt mjög vel að skora með landsliðinu og vonandi fer það líka að gerast hjá Swansea," sagði Gylfi.

Þrátt fyrir marka- og stoðsendingaleysið er Gylfi Þór alltaf í byrjunarliðinu hjá Garry Monk, knattspyrnustjóra Swansea, sem spilaði með Gylfa þegar landsliðsmaðurinn var á láni þar 2012.

"Það er mjög þægilegt að vita að hann hefur trú á mér. Þó maður skori ekki í tveimur til þremur leikjum í röð þá er ég alltaf í byrjunarliðinu. Það þýðir samt ekkert að maður geti sest á rassinn í leikjum og hætt að vinna fyrir liðið," sagði Gylfi Þór Sigurðsson.