Einn af fyrrum höfuðpaurum FIFA framseldur til Bandaríkjanna

Einn sá spilltasti sem starfað hefur hjá FIFA, Jack Warner, fyrrum varaforseti sambandsins, verður framseldur til Bandaríkjanna þar sem mál hans verður tekið fyrir dómstólum.

Warner sem er 72 árs gamall var ásamt 13 öðrum núverandi og fyrrverandi starfsmönnum FIFA kærður af bandarískum dómsmálayfirvöldum fyrir mútuþægni og spillingu en hann barðist gegn því að hann yrði framseldur til Bandaríkjanna þar sem málið verður tekið fyrir.

Nú hefur saksóknari Trínidad og Tóbagó staðfest að framsalsbeiðnin sé lögmæt og að það eigi að framselja Warner til Bandaríkjanna.

Nýlega samþykkti saksóknarinn í Sviss að annar fyrrum varaforseti sambandsins, Eugenio Figueredo, yrði framseldur til Bandaríkjanna þar sem mál hans yrði tekið fyrir.

Warner var á sínum tíma einn valdamesti maðurinn innan knattspyrnuheimsins en allar þjóðir sem sóttu um að halda lokakeppni HM þurftu að fá hann á sitt band. Hefur hann samkvæmt rannsóknum bandarískra yfirvalda tekið við mútum í tvo áratugi í starfi.