Benzema sá um Baskana frá Bilbao

Real Madrid tyllti sér á topp spænsku úrvalsdeildarinnar í fótbolta með 1-2 sigri á Athletic Bilbao á útivelli í kvöld.

Lærisveinar Rafa Benítez eru nú með 13 stig, jafnmörg og Celta Vigo (sem vann stórsigur á Barcelona í kvöld) en betri markatölu.

Karim Benzema var hetja Real Madrid í kvöld en hann skoraði bæði mörk liðsins, það fyrra á 19. mínútu og það síðara á 70. mínútu.

Sabin jafnaði fyrir Baskana á 67. mínútu en þetta var fyrsta markið sem Real Madrid fær á sig í spænsku deildinni á tímabilinu.

Cristiano Ronaldo tókst ekki að skora í kvöld en næsta mark hjá honum verður hans 500. á ferlinum.