Jordan Spieth tryggði sér Fed-Ex bikarinn

Jordan Spieth sigraði í sínu fimmta móti á PGA-mótaröðinni á árinu nú í kvöld en hann lék best allra á Coca Cola meistaramótinu, lokamóti mótaraðarinnar þetta tímabilið.

Spieth átti eitt högg á Henrik Stenson fyrir lokahringinn og þeir börðust um efsta sætið framan af.

Stenson missti þó einbeitinguna á seinni níu holunum sem hann lék á þremur yfir pari og Spieth nýtti sér það með því að fá örugg pör á síðustu sjö holurnar.

Hann lék hringinn í kvöld á einu höggi undir pari og endaði fjórum höggum á undan næstu mönnum, á níu undir pari samtals.

Danny Lee, Justin Rose og Henrik Stenson deildu öðru sætinu á fimm höggum undir pari en Bubba Watson, Dustin Johnson og Paul Casey komu þar á eftir á fjórum undir.

Rory Mcilroy var í góðum málum fyrir lokahringinn og hefði með góðri frammistöðu getað gert atlögu að sigrinum.

Hann fann sig þó alls ekki í kvöld og fékk hvern skollan á fætur öðrum en hann endaði jafn í 16. sæti á einu yfir pari.

Coca Cola meistaramótið á East Lake var einnig lokamót Fed-Ex bikarsins þar sem milljarðir króna eru í verðlaunafé fyrir bestu kylfinga PGA-mótaraðarinnar.

Með sigrinum í kvöld þarf Jordan Spieth því ekki að hafa áhyggjur af peningamálum næstu árin en hann fékk samtals 11.6 milljón dollara í verðlaun eða rúmlega einn og hálfan milljarð íslenskra króna.

Henrik Stenson þarf að láta sér lynda þrjár milljónir dollara í verðlaunafé fyrir annað sætið sem verður þó að teljast ágætis búbót.

Næst á dagskrá í golfheiminum er Forsetabikarinn sem fer fram snemma í október en seinna í mánuðinum hefst svo nýtt tímabil á PGA-mótaröðinni með Frys.com meistaramótinu.