Bílar

Aukin dauðsföll gangandi vegfarenda vegna símnotkunar

Finnur Thorlacius skrifar
Gangandi vegfarendur skeyta ekki um umferðina og eru djúpt sokknir í síma sína.
Gangandi vegfarendur skeyta ekki um umferðina og eru djúpt sokknir í síma sína.
Þó svo að dauðsföll í umferðinni hafi minnkað í Bandaríkjunum á undaförnum árum hefur dauðsföllum gangandi vegfarenda þar fjölgað um 15% frá 2009 til 2013 og er símnotkun vegfarenda þar kennt um. Árið 2013 dóu 4.735 gangandi vegfarendur í Bandaríkjunum og voru það 14% allra dauðsfalla í umferðinni þar vestra.

Það þýðir að á tveggja klukkutíma fresti lætur einhver gangandi vegfarandi lífið. Í mörgum borgum Bandaríkjanna hafa borgaryfirvöld hafið herferðir sem beint er að gangandi vegfarendum og símnotkunar þeirra. Í Philadelphia auglýsa borgaryfirvöld undir yfirskriftinni „Put Phone Down“ og er þar bent á að margir gangandi vegfarendur skeyti ekkert um umferðina og gangi yfir götur kafsokknir í eigin síma og sé því mikil hætta búin. Í Flórída er samskonar herferð í gangi undir yfirskriftinni „Alert Today, Alive Tomorrow“.

Rannsóknir sýna að áfengi kemur mest við sögu við dauðsföll gangandi vegfarenda, en í 49% slíkra tilvika voru annaðhvort vegfarendurnir sjálfir eða bílstjórarnir undir áhrifum. Í könnun sem gerð var við 20 hættuleg vegamót í Bandarískum borgum voru 26% gangandi vegfarenda með tónlist í eyrunum, 13% voru í símanum en 15% voru að skoða upplýsingar í síma sínum eða senda textaskilaboð úr honum.

Af þeim sem gengu yfir þessi gatnamót með logandi „Dont Walk“-skilaboð voru helmingur vegfarenda uppteknir af símum sínum. Þessi vandi einskorðast náttúrulega ekki við Bandaríkin og kannast margir í umferðinni hér á landi við þennan vanda. Því þurfa ökumenn nú að vera meðvitaðri en áður um gangandi vegfarendur.  

Mest lesið




×

Mest lesið