Filippískur landsliðsmaður klárar tímabilið með Grindavík

Ángel Guirado hefur skrifað undir samning við 1. deildarlið Grindavíkur og verður með liðinu í síðustu sjö umferðum sumarsins.

Ángel Guirado er spænskur sóknarmaður sem spilaði síðast með liði Udon Thani F.C. á Tælandi.

Guirado er orðinn þrítugur en hann er 191 sentímetrar á hæð og spilar annaðhvort sem fremsti miðjumaður eða framherji.

Ángel Guirado spilar með landsliði Filippseyja og hefur skorað 8 mörk í 30 landsleikjum en síðasta mark hans með landsliðinu var árið 2012.

Ángel Guirado hefur fengið leikheimild með Grindavíkurliðinu og má spila með liðinu í kvöld þegar liðið heimsækir Þrótt í Laugardalinn.

Þessi reynslumikli leikmaður ætti að hjálpa Tommy Nielsen og strákunum hans á lokaspretti mótsins.

Grindvíkingar hafa komið sterkir til baka eftir slæma byrjun og hafa aðeins tapað einum af síðustu sjö leikjum sínum. Grindavík vann 5-0 sigur á Selfossliðinu í síðasta leik.

Ungu strákarnir Alex Freyr Hilmarsson og Hákon Ívar Ólafsson skoruðu báðir tvö mörk í þeim leik.