Lögfræðingur og rithöfundur tekjuhæsti listamaðurinn

Ragnar Jónasson, höfundur Rofs, Snjóblindu og fleiri skáldsagna, trónir efst á lista tekjublaðs Frjálsrar verslunar yfir tekjuhæstu listamenn Íslands. Ragnar er þar skráður með tæplega 2,5 milljónir króna í tekjur á mánuði.

Listsköpun Ragnars er þó sennilega ekki helsta tekjulind hans, en hann gegnir einnig starfi yfirlögfræðings fjármálafyrirtækisins GAMMA, gegndi áður stöðu forstöðumanns skrifstofu slitastjórnar Kaupþings og er stundakennari við lagadeild Háskólans í Reykjavík.

Rithöfundurinn Sjón er í öðru sæti listans með rúmlega 1,7 milljónir króna á mánuði. Næstir á eftir fylgja þeir Bragi Valdimar Skúlason, hugmyndasmiður grínhópsins Baggalúts og auglýsingaskrifstofunnar Brandenburg, með rúmlega 1,6 milljónir á mánuði, tónlistarmaðurinn Megas með rúmlega 1,4 milljónir á mánuði og Einar Örn Benediktsson, tónlistarmaður og fyrrverandi borgarfulltrúi, með rúmlega 1,3 milljónir á mánuði.

Eggert Pétursson málari er tekjuhæsti myndlistarmaður landsins með rúmlega 1,1 milljón á mánuði og Rúnar Freyr Gíslason tekjuhæsti leikarinn með rúmlega eina milljón á mánuði. Engin kona er meðal tíu tekjuhæstu listamanna landsins en Margrét Vilhjálmsdóttir leikkona er í 13. sæti með 917 þúsund krónur á mánuði.

Listi Frjálsrar verslunar er byggður á útsvarsskyldum tekjum á árinu 2014 og þurfa þær því ekki að endurspegla föst laun viðkomandi. Í einhverjum tilvikum kann skattstjóri að hafa áætlað tekjur.