Gunnar Bender með nýjan veiðiþátt

Stangveiðifrömuðurinn Gunnar Bender stjórnar nýjum og ferskum veiðiþáttum á sjónvarpsstöðinni Hringbraut í sumar en þar hefur hann margreyndan kvikmyndatökumann með sér á bak við linsuna, Steingrím Jón Þórðarson.

Gunnar Bender er þjóðkunnur á þessu sviði sportveiði, en um langt árabil hefur hann skrifað um stangveiði um allt land, jafnt fyrir blöð og bækur og þá hefur hann á seinni árum verið ötull framleiðandi sjónvarpsþátta um þetta mikla áhugamál sitt.

Í þáttunum verður víða komið við eins og efni standa náttúrlega til; fylgst verður með opnunardeginum í Norðurá í fyrsta þætti þar sem kóngarnir Bubbi Morthens og Bó Halldórs munduðu stangir sínar af fádæma kúnst - og þá er heldur ekki útlokað að landsmenn fái að fylgjast með sjálfum forsætisráðherra landsmanna kippa í línuna á árbakkanum. Áhersla þáttanna verður á fjölbreytni og fagmennsku en þeir eiga að miðla öllu því helsta sem er að gerast og gerjast í þessari einni vinsælustu útivist landsmanna.

Steingrímur Jón Þórðarson, myndatökumaður þáttanna á að baki áratugareynslu við upptöku sjónvarpsþátta, en hann vann fjórtán ár samfellt við hlið Jóns Ársæls Þórðarsonar í þættinum Sjálfstætt fólk á Stöð 2. Þættirnir, sem bera heitið Við árbakkann, verða frumsýndir klukkan 20.00 á fimmtudagskvöldum í sumar og byrjar fyrsti þátturinn 2. júlí.