Veiddi 3.2 kg bleikju í Hlíðarvatni

Vatnaveiðin er komin á gott skrið og daglega berast fréttir af góðri veiði hjá veiðimönnum og veiðikonum.

Ein af þeim sem er dugleg við bakkana er María Petrína Ingólfsdóttir en hún átti sannarlega góðan dag við Hlíðarvatn í gærkvöldi. Eins og sést á meðfylgjandi mynd er ekki um neina smábleikju að ræða en hún vó í það heila 3.2 kg og er um 60 sm að lengd og nokkuð ljóst að þetta er stærsta bleikjan úr vatninu í sumar og ein af þeim stærri sem við höfum frétt af það sem af er sumri.

„Ég tók þessa við Urrðarnefið hjá Kaldósnum, á Krókinn #12 það tók mig allavega 20 - 25 mín að landa henni, einfaldlega vegna þess að ég var með frekar grannan taum og hún sótti mjög að fara hringinn í kring um stóra grjótið sem er þarna í víkinni. Hún var laus um leið og ég tók hana í háfinn. Fékk fullt að góðum tökum við vatnið í gær (var þar 4 tíma) en flestar losnuðu“ sagði María þegar Veiðivísir náði tali af henni í dag. Við óskum henni til hamingju með þennan glæsilega fisk og hlökkum til að heyra meira af ferðum hennar við bakkana í sumar.