Hrafnhildur Lúthersdóttir setti nú rétt í þessu nýtt Íslandsmet í 100 metra bringusundi á Smáþjóðaleikunum.
Hrafnhildur synti á tímanum 1:08,07 mínútum og sló Íslandsmetið, sem hún átti sjálf, um 12 hundraðhluta úr sekúndu. Hrafnhildur gerði sér einnig lítið fyrir og sló eigið mótsmet á Smáþjóðaleikunum. Gamla metið, sem hún setti í Liechtenstein fyrir fjórum árum, var 1:10,92 mínútur.
Sjá einnig: Hrafnhildur náði Ólympíulágmarki í 200 metra bringusundi.
Jóhanna Gerða Gústafsdóttir hirti silfurverðlaunin en hún kom í bakkann á 1:13,19 mínútum.
Í karlaflokki í 100 metra bringusundi hafnaði Anton Sveinn McKee í öðru sæti en hann synti á 1:02,81 mínútum. Laurent Carnol frá Lúxemborg varð hlutskarpastur á tímanum 1:01,24 mínútum sem er nýtt mótsmet. Gamla metið átti Jakob Jóhann Sveinsson - 1:02,60 mínútur.
Viktor Máni Vilbergsson hafnaði í 5. sæti á tímanum 1:05,85 mínútum.
Í 200 metra skriðsundi kvenna nældi Inga Elín Cryer sér í bronsverðlaun en hún synti á tímanum 2:05,40 mínútum. Í karlaflokki endaði Daníel Hannes Pálsson í 4. sæti á tímanum 1:55,00 mínútum. Kristófer Sigurðsson kom fast á hæla hans á tímanum 1:55,34 mínútum.
Bryndís Rún Hansen vann til silfurverðlauna í 50 metra skriðsundi en hún synti á 25,95 sekúndum. Ingibjörg Kristín Jónsdóttir kom næst á tímanum 26,39 sekúndum.
Í karlaflokki í 50 metra skriðsundi hafnaði Alexander Jóhannesson í 3. sæti á tímanum 23,70 mínútum. Ágúst Júlíusson kom þar á eftir á 24,20 sekúndum.
Uppfært klukkan 20:00.
Boðsundssveit Íslands í karlaflokki vann til silfurverðlauna í 4x100 metra boðsundi. Íslenska sveitin synti á tímanum 3:49,01 mínútum. Sveitina skipuðu Kolbeinn Hrafnkelsson (bak), Anton Sveinn McKee (bringa), Ágúst Júlíusson (flug) og Alexander Jóhannesson (skrið).
Hrafnhildur með gull og nýtt Íslandsmet í 100 metra bringusundi
Tengdar fréttir
Hrafnhildur náði Ólympíulágmarkinu í 200 metra bringusundi | Myndir
Sundkonan Hrafnhildur Lúthersdóttir, sem náði Ólympíulágmarkinu í 200 metra fjórsundi í gær, hélt uppteknum hætti í dag á Smáþjóðaleikunum sem standa nú yfir hér á landi.
Hrafnhildur náði Ólympíulágmarki
Náði frábærum árangri í 200 m fjórsundi á Smáþjóðaleikunum í gær.
Hrafnhildur með 16. besta tíma ársins
Íslandsmetið sem skilaði gullinu í 200 metra bringusundi í gærkvöldi skaut henni upp heimslistann.
Hrafnhildur bætti met Eyglóar | Níu íslensk verðlaun í sundinu
Hrafnhildur Lúthersdóttir og Eygló Ósk Gústafsdóttir unnu bæði gullverðlaun á fyrsta keppnisdegi í sundi á Smáþjóðaleikunum í Reykjavík. Anton Sveinn McKee bætti Íslandsmet.
