Lilleström og Rosenborg með sigra

Rúnar Kristinsson og lærisveinar hans í Lilleström unnu góðan 3-1 sigur á Sarpsborg 08 í norsku úrvalsdeildinni í knattspyrnu í dag.

Staðan var 0-1 fyrir Lilleström í hálfleik sem bætti við tveimur mörkum í síðari hálfleik áður en Sarpsborg klóraði í bakkann.

Lilleström er komið upp í áttunda sætið, en liðið er með tólf stig eftir níu leiki.

Finnur Orri Margeirsson spilaði allan leikinn fyrir Lilleström, en Árni Vilhjálmsson var ekki í leikmannahópnum.

Rosenborg vann stórsigur á Sandefjord 5-1 í sömu deild. Staðan var 2-1 fyrir Rosenborg í hálfleik sem spýtti í lófana í síðari hálfleik og vann að lokum 5-1.

Rosenborg er á toppnum með 22 stig, en Stabæk kemur næst með 20 stig.

Hólmar Örn Eyjólfsson stóð vaktina í vörn Rosenborg allan leikinn.

Daníel Leó Grétarsson spilaði í þrjátíu mínútum fyrir Álasund sem tapaði 3-1 gegn Stromsgodset á útivelli í dag.

Aron Þrándarson spilaði ekki vegna meiðsla, en Álasund er með ellefu stig eftir níu leiki. Liðið er í ellefta sæti.