Eigandi steradrykkjarins ekki náinn vinur

Handknattleikskappinn Jóhann Birgir Ingvarsson segir að eigandi steradrykksins sem hann tók sopa af hafi ekki verið náinn vinur hans. Hann hafi heldur ekki verið einn af hans reglulegu æfingafélögum. Hann sé viðkomandi þó þakklátur fyrir að hafa viðurkennt fyrir sér að drykkurinn sem hann gaf Jóhanni sopa af hafi innihaldið anavar. Þetta kemur fram í yfirlýsingu sem Jóhann sendi Vísi.

Jóhann var sem kunnugt er dæmdur í sex mánaða keppnisbann þar sem hann féll á lyfjaprófi að loknum bikarúrslitaleik FH og ÍBV þann 28. febrúar. Í sýni Jóhanns fundust vefaukandi sterara. Lyfjaráð fór fram á tveggja ára dóm yfir honum en niðurstaðan var sex mánuðir. Skúli Skúlason, formaður lyfjaráðs, sagði við Vísi að dómurinn væri viss vonbrigði. Hann hefði sætt sig við eins árs dóm en Jóhann Birgir er á 21. aldursári.

Crossfit samband Íslands sendi frá sér tilkynningu í dag vegna fréttar af Jóhanni og keppnisbanninu. Sagði Svanhildur Nanna Vigfúsdóttir, stjórnarformaður Crossft sambands Íslands að íþróttamenn ættu að axla ábyrgð og ómögulegt væri að ætla annað en að Jóhann Birgir vissi hvað væri í drykknum.

Ekki reglulegur æfingafélagi

Sá sem átti drykkinn sem Jóhann Birgir tók sopann af, hvorki vinur né reglulegur æfingafélagi að hans sögn, sagði við Jóhann að í drykknum hefði verið anavar „eins og (hjá) 90% Crossfitara í keppnum.“

Jóhann segist í yfirlýsingunni æfa með félögum sínum í Crossfit Hafnarfjarðar. Hann hafi þó ekki tekið sopa af umræddum drykk þar.

„Þetta var í öðrum æfingasal s.s. þar sem æfðar eru íþróttir sem eru undir ÍSÍ og ekki einn af reglulegu æfingafélögum mínum.“ Jóhann ítrekar að hann hafi aldei sagt neitt um crossfitara. Þau orð hafi hann einfaldlega eftir eiganda drykkjarins þegar Jóhann leitaði skýringa á því hvernig á því stæði að vefaukandi sterar hefðu fundist í lyfjaprófinu.

Þakklátur aðilanum en gefur ekki upp nafn hans

„Af skiljanlegum ástæðum get ég ekki ekki gefið upp nafn viðkomandi þar sem viðurkenning hefði aldrei fengist ef hætta væri á að upp kæmist um aðilann.  Ég er þakklátur aðilanum fyrir að viðurkenna sinn hlut og koma með gögn fram í málinu sem gerðu að verkum að ég var ekki dæmdur fyrir ásetning annars íþróttamanns,“ segir Jóhann.

Varðandi fullyrðingu kunningjans um anavar notkun hjá iðkendum í Crossfit segir Jóhann ekki vita hvort hann hafi verið að milda aðkomu sína að málinu eða afsaka efnanotkunina. Hver heilsteyptur Crossfittari og almenningur hljóti að átta sig á því að orðum sé ofaukið.

„Ljóst er að Crossfit er frábær íþrótt og leitt er ef Crossfit samband Íslands eða Crossfit Hafnarfjarðar, þar sem ég hef æft inn á milli, verða fyrir ástæðulausum álitshnekki. Félagar mínir í Crossfit Hafnarfjarðar komu hér hvergi nærri,“ segir Jóhann Birgir. Honum þyki leitt að ef sá misskilningur sé uppi að ummælin um Crossfitara og anavar séu frá honum komin. Sömuleiðis hafi það valdið einhverjum óþægindum sem hafi ekkert með málið að gera.