Aaru´s Awakening lendir á PlayStation á þriðjudaginn

Íslenski tölvuleikurinn Aaru‘s Awakening verður gefinn út fyrir PlayStation leikjatölvuna á næstu dögum. Sony hefur keypt útgáfurétt á leiknum og mun færa átta milljón PlayStation-spilurum vítt og breitt um heiminn leikinn þeim að kostnaðarlausu.

Aaru‘s Awakening hefur verið í þróun síðan í mars tvö þúsund og tólf. Í febrúar síðastliðnum var leikurinn gefinn út á leikjaveitunni Steam, fyrir Mac, PC og Linus, þar sem virkir notendur eru í kringum hundrað milljónir.

Leikurinn hefur notið mikilla vinsælda og fengið lofsamlega dóma, þá sérstaklega fyri spilun og útlit en hann er að stórum hluta handteiknaður.

Lumenox, fyrirtækið sem á heiðurinn af Aaru‘s Awakening hefur nú samið við Sony um útgáfu leiksins fyrir PlayStation, vinsælustu leikjavél veraldar. Sony mun gefa þeim sem nýta sér áskriftarþjónustu PlayStation leikinn.

„Þetta er svakalegur áfangi,“ segir Burkni J. Óskarsson, framkvæmdastjóri Lumenox. „Þetta er ekkert annað en stórsigur fyrir okkur. Markaðssetningin og dreifingin er eitthvað sem við gætum aldrei knúið fram sjálfir.“

Það er erfitt að búa til tölvuleik og fyrir lítið frumkvöðlafyrirtæki eins og Lumenox útheimtir slík útgáfa gríðarlega vinnu í bæði þróun og markaðssetningu. Þetta er tekið á hnefanum, eins og Burkni orðar það.

„Í fyrsta lagi var erfitt að komast þarna inn, þeir sérvelja það sem fer inn. Svo að þeir vilji setja okkur í þessa dreifingu, þetta er beint flug upp á við hjá okkur og langt umfram það sem við höfðu vonir um.“

„Þetta er gríðarlega krefjandi, þetta er búið að taka okkur þrjú ár,“ segir Burkni. „Þar af er PlayStation hlutinn búinn að taka síðustu 6 mánuði. Síðan er leikurinn í þessum töluðu orðum í skoðun hjá Xbox og við erum að bíða eftir að fá staðfestingu frá þeim og ég vona að það komi í dag.“