Gríðarlegur fjöldi erlendra vígamanna berst með hryðjuverkahópum

Meira en 25.000 útlendingar frá yfir 100 löndum hafa ferðast til annarra landa til þess að berjast með hryðjuverkahópum á borð við al-Qaeda og Íslamska ríkið. Þetta kemur fram í nýrri skýrslu Sameinuðu þjóðanna.

Í skýrslunni segir að frá miðju síðasta ári og þar til í mars á þessu ári hafi fjöldi erlendra vígamanna í heiminum aukist um 71%. Langflestir ferðast til Sýrlands og Íraks.

Talið er að allt að 22.000 útlendingar séu í Sýrlandi og Írak gagngert til þess að berjast, 6.500 eru sagðir vera í Írak og nokkur hundruð í Jemen, Líbýu, Pakistan og Sómalíu.

Ætlaði að fljúga í gegnum Ísland á leið sinni til Sýrlands

Í skýrslunni er fjallað um nokkra af þessum vígamönnum, meðal annars Michael Wolfe sem er 23 ára gamall Texasbúi.

Hann ætlaði að fljúga til Íslands og þaðan til Tyrklands. Frá Tyrklandi ætlaði hann svo til Sýrlands til þess að taka þátt í stríðinu með Íslamska ríkinu.

Wolfe leitaði ráða varðandi ferðalög sín hjá leynilögreglumanni FBI, án þess auðvitað að vita að viðkomandi starfaði þar. Hann var því handtekinn áður en hann fór frá Bandaríkjunum til Íslands.

Samfélagsmiðlar mikilvægir fyrir hryðjuverkahópa

Mikill fjöldi þeirra sem fara til Sýrlands og Íraks koma frá Túnis, Marokkó, Frakklandi og Rússlandi. Þá hefur einnig aukist að menn komi frá Maldíveyjum, Finnland og Trínidad og Tóbagó.

Þá er augljóst af skýrslu Sameinuðu þjóðanna hversu stóru hlutverki samfélagsmiðlar gegna í því að tengja hryðjuverkahópana við fólk alls staðar úr heiminum.

Kalla skýrsluhöfundar eftir meiri samvinnu á milli þjóða við það að reyna að komast að því hverjir það eru sem fara til þess að berjast með hryðjuverkahópum.