Sjáðu glæsilegt mark Lennons beint úr aukaspyrnu

FH vann Fylki, 2-1, í riðli 1 í Lengjubikarnum í fótbolta í gærkvöldi og er nú með tólf stig eftir fimm leiki en Fylkir er enn á toppi riðilsins með þrettán stig.

Ásgeir Örn Arnþórsson kom Fylki yfir í gærkvöldi með skrautlegu marki á 50. mínútu en Atli Guðnason jafnaði metin úr vítaspyrnu tólf mínútum síðar.

Steven Lennon féll þá í teignum við litla snertingu en Garðar Örn Hinriksson, dómari leiksins, dæmdi vítaspyrnu.

Lennon átti eftir að hafa enn meiri áhrif á leikinn því hann skoraði sigurmarkið með gullfallegu skoti í stöngina og inn beint úr aukaspyrnu tveimur mínútum síðar.

Leikurinn var í beinni útsendingu á Sport TV en mörkin úr leiknum má sjá í myndbandinu hér að ofan.