Heldur kaldur aðdragandi fyrir opnun veiðisvæðanna

Núna eru sex dagar í að fyrstu veiðisvæðin opni og það er alveg ljóst þegar veiðispjallþræðir á samfélagsmiðlunum eru skoðaðir að það er spenna í loftinu.

En spennan sú er þó lævi blandin að einhverju leiti og þá sér í lagi þegar veðurspáin er skoðuð.   Það er nefnilega spáð ansi köldu veðri á mánudag og þriðjudag, svo ofan á það snjókomu víða um land um helgina.  Snjókoma er eitt en frostið er bara allt annað því það er fátt leiðinlegra en þegar það frýs í lykkjunum allann daginn.  Einhver ráð eru þó til við því  og sumir veiðimenn nota t.d. saltvatn eða edik með góðum árangri til að koma í veg fyrir þetta vandamál.

Annars virðast svæðin koma vel undan vetri og á sjóbirtingsslóðum fyrir austan er meira og minna íslaust á ánum og alls ekki mikill ef nokkur snjór í byggð en auðvitað skaflar á stangli við árnar.  Veiðimenn vona auðvitað að tíðin verði betri en í fyrra en þá var oft ansi lélegt veður alveg fram í miðjan maí.  Vötnin opna svo hvert af öðru og verður vatnaveiðin komin á fullt á láglendinu 1. maí.