Ætla að reyna að koma ferðamönnum niður af Vatnajökli

Björgunarfélag Hornafjarðar er nú á leið inn á Vatnajökul til að sækja erlendan ferðamann sem óskaði aðstoðar í dag. Hann er á ferð með tveimur félögum sínum en treystir sér ekki til að halda ferðalaginu áfram.

Veðurspáin fyrir svæðið er mjög slæm og fer veður að versna upp úr klukkan átta í kvöld. Félagar mannsins hyggjast halda ferðinni áfram en björgunarsveitarmenn ætla að gera þeim grein fyrir útlitinu og reyna að fá þá til að koma niður af jöklinum.

Vélsleðamenn Björgunarfélagsins á Höfn er komnir um fimmtán kílómetra inn á jökulinn og ættu að vera komnir að mönnunum um sexleytið, að því er kemur fram í tilkynningu frá Slysavarnafélaginu Landsbjörg.

Uppfært klukkan 19.30: Vélsleðamenn hafa sótt manninn og eru þeir á leið með hann til byggða. Ekki liggur fyrir hvort maðurinn sé eitthvað slasaður. Ferðafélagar hans voru upplýstir um útlit og aðstæður en ákváðu að halda ferð sinni áfram.