Benzema og Ronaldo á skotskónum í sigri Real Madrid

Real Madrid náði fjögurra stiga forskoti á toppi spænsku úrvalsdeildarinnar með 0-2 sigri á Elche á útivelli í kvöld.

Þetta var annar deildarsigur Evrópumeistaranna í röð eftir stórtapið gegn Atletico Madrid fyrir tveimur vikum.

Staðan var markalaus í hálfleik en á 56. mínútu kom Karim Benzema Madrídingum yfir með sínu 18. marki í vetur.

Það var svo Cristiano Ronaldo sem gulltryggði sigurinn með skallamarki á 69. mínútu eftir sendingu frá Isco.

Þetta var mark númer 290 sem Ronaldo skorar fyrir Real Madrid en hann er nú kominn upp að hlið Santillana í 3.-4. sæti yfir markahæstu leikmenn sögu félagsins. Aðeins Raúl og Alfredo di Stefano hafa skorað fleiri.

Þess má geta að Ronaldo þurfti aðeins 281 leik til að ná þessum markafjölda.