ISIS-liðar eyðileggja 3.000 ára gamla fornmuni

Liðsmenn ISIS hafa birt myndband sem sýnir þá eyðileggja ævaforna muni á safni í íröksku borginni Mosul.

Myndbandið er um fimm mínútur á lengd þar sem sést hvernig ISIS-liðar notast við sleggjur og bora til að eyðileggja fjölda stórra styttna. Á meðal styttnanna er ein af vængjaðri gyðju frá 9. öld fyrir Krist og önnur frá 7. öld fyrir Krist.

Myndbandið er með fána ISIS í horninu og var birt á einni Twitter-síðu samtakanna.

Liðsmenn samtakanna hafa eyðilagt fjölda múslímskra helgistaða í tilraun til að eyða því sem þeir kalla villitrú. Í janúar brenndu ISIS-liðar þúsundir fornra handrita og sjaldgæfra rita.

Í frétt Mashable segir að talið sé að ISIS-liðar hafi einnig selt fjölda fornmuna á svörtum markaði til að fjármagna herferð sína í heimshlutanum.

Að neðan má sjá brot úr myndbandinu þar sem ISIS-liðar eyðileggja fornmunina á safninu í Mosul.