Stefnum öll að stóru marki

„Við erum öll á lokastigi söngnáms í Söngskólanum í Reykjavík og Söngskóla Sigurðar Demetz og erum í kór Langholtskirkju en höfum aldrei sungið einsöng á sömu tónleikum,“ segir Anna Guðrún Jónsdóttir um einsöngvarahópinn, sem kemur fram í Langholtskirkju á morgun klukkan 17.

Hún segir um fjölbreytta dagskrá að ræða.

„Við syngjum meðal annars verk eftir Bizet, Strauss, Mozart, Weber og Gluck,“ segir Anna Guðrún og kveðst sjálf vera með þrjú atriði, tvö úr Orfeusi og Evridísi eftir Gluck og eitt úr Cosi Fan Tutte eftir Mozart.

Aðspurð segir Anna Guðrún verkfall tónlistarkennara vissulega koma illa við hópinn.

„Við erum að missa niður marga tíma bæði í kennslu og undirleik og eins í bóklegum fögum. „Það er bagalegt því við stefnum öll að stóru marki innan tíðar og erum byrjuð að skipuleggja nám í framhaldinu.“