Ævisaga pólsks forseta

Pólskir kvikmyndadagar hefjast á morgun, fimmtudag, í Bíó Paradís og standa til 26. apríl. Dagarnir eru haldnir í tengslum við verkefnið Ísland og Pólland gegn útilokun frá menningu sem er samstarfsverkefni á sviði lista á milli Íslands og Póllands. Grundvallarmarkmið þess er að auka aðgengi fatlaðra að menningu með sjónlýsingar að leiðarljósi.

Á árunum 2013-2016 voru og verða sýndar í Wrocaw, Reykjavík og Hafnarfirði pólskar og íslenskar kvikmyndir og leikrit jafnframt því sem haldnar verða listasýningar með það að markmiði að kynna menningararfleifð beggja landa. Einnig munu fara fram námskeið, samkomur og ráðstefnur sem miðla munu upplýsingum um hvernig hægt er að auðvelda fötluðum aðgengi að menningu.

Opnunarmynd hátíðarinnar er Lech Walesa. Maður vonar sem var framlag Póllands til Óskarsverðlaunanna. Sýningin er klukkan 16.00 og er frítt inn á hana. Kvikmyndin er sýnd með enskum texta og boðið er upp á heyrnartól fyrir sjónlýsingu og samtöl á íslensku eru aðgengileg fyrir blinda og sjónskerta.

Lech Walesa. Maður vonar fjallar um verkalýðsleiðtoga og stjórnmálamann sem var driffjöður í þeim breytingum sem áttu eftir að ná lengra en fólk leyfði sér að vona. Myndin er ævisaga pólsks forseta og Nóbelsverðlaunahafa sem talinn er meðal hundrað mikilvægustu manna tuttugustu aldarinnar.