Alfreð með tvö fyrstu mörkin sín fyrir Real Sociedad

Alfreð Finnbogason opnaði markareikning sinn hjá Real Sociedad í kvöld þegar hann skoraði bæði mörk liðsins í 2-0 sigri á c-deildarliðinu Oviedo í 32 liða úrslitum spænska Konungsbikarsins.

Oviedo og Real Sociedad gerðu markalaust jafntefli í fyrri leiknum sem fór fram á heimavelli Oviedo. Real Sociedad vann því samanlagt 2-0.

Alfreð skoraði fyrra mark sitt á 27. mínútu leiksins með vinstri fótar skoti eftir sendingu Pablo Hervías en það síðara skoraði Alfreð á 61. mínútu þegar hann fylgdi eftir skoti félaga síns. Alfreð fékk síðan heiðursskiptingu á 83. mínútu leiksins.

David Moyes stillti upp í leikkerfinu 4-2-3-1 og var Alfreð fremstur með þá Sergio Canales, David Zurutuza og Pablo Hervías fyrir aftan sig.

Alfreð var fyrir leikinn búinn að spila þrettán leiki í öllum keppnum með Real Sociedad án þess að ná að skora. Tíu af þessum leikjum voru í spænsku úrvalsdeildinni.

Alfreð fékk stuðningsyfirlýsingu frá David Moyes fyrir leikinn og það er ljóst á öllu að það hefur gefið okkar manni sjálfstraust til að brjóta ísinn og skora sitt fyrsta mark fyrir Real Sociedad.